SKÁLD.IS

Ásta Fanney Sigurðardóttir er fædd árið 1987. 

Ásta Fanney lauk stúdentsprófi frá Menntaskólanum í Reykjavík og námi í myndlist frá Listaháskóla Íslands. Hún starfar sem ljóðskáld og myndlistarmaður, hefur t.a.m. birt ljóð í tímaritinu Stínu og í kvæðasöfnunum Ljóð í leiðinni: Skáld um Reykjavík og Þokulúður. Þá er hún er ein af stofnendum Kunstschlager gallerís í Reykjavík.

Fyrsta ljóðabók Ástu Fanneyjar, Herra Hjúkket, kom út í seríu Meðgönguljóða 2012. Þá sendi hún frá sér bókverkið Kaos Lexicon 2017 og ljóðabókina Eilífðarnón 2019. Síðastnefnda bókin hefur verið þýdd á sænsku, þýsku og ensku.

Í viðtali af tilefni útgáfu Eilífðarnóns fjallar Ásta Fanney um tilurð bókarinnar og segir:

„Hún er ekki beint skrifuð af mér heldur meira eins og skilaboð eða afurð sem átti að vera til. Ég var bara ljóðaþjónn að útskýra það […]. Þetta fjallar að hluta til um skilning á tilveru og tíma, gildrur, lykla og leiðarvísa um hugsanir. Þá list að vera til þegar það er auðvelt að stíga í þá gildru að vera klofin vera sem er föst í þátíð eða framtíð. Eilífðin er annar skilningur á tíma og eilífðarnón er punktur, blekking og sannleikur í senn. Kannski staður á milli svefns og vöku.“

Bókin vitnar að mörgu leyti um myndlistarbakgrunn skáldkonunnar; dregnar eru upp forvitnilegar og óvenjulegar myndir og leikið er með útlit texta og hönnunar.

Heimild: Vefsíða Partusar