HEIÐURSVIÐURKENNING LESTRARKLEFANS
Sá gleðilegi viðburður varð í vikunni að menningarvefurinn Lestrarklefinn hlaut sérstaka heiðursviðurkenningu við afhendingu íslensku hljóðbókaverðlaunanna, Storytel Awards, fyrir framlag til umræðu um bókmenntir og lestrarmenningu á Íslandi.
"Lestrarklefinn er grasrótarvettvangur sem hefur frá árinu 2018 unnið óeigingjarnt og kraftmikið starf við að halda bókmenntaumræðu á Íslandi lifandi. Á vefnum er fjallað af ástríðu og fagmennsku um bækur í öllum formum – hvort sem um er að ræða prentaðar bækur, hljóðbækur eða rafbækur – auk leikhúss og menningar í víðara samhengi,“ segir í umsögn dómnefndar þar sem jafnframt kemur fram að með vandaðri umfjöllun, fjölbreyttu efni og persónulegri nálgun hafi Lestrarklefinn veitt aðgengilega bókmenntaumfjöllun og tengt saman lesendur, höfunda og verk á lifandi hátt.
Í þakkarræðu Rebekkju Sifjar, ritstjóra Lestrarklefans, kemur fram þessi ástríða fyrir bókmenntum sem við í ritstjórn Skáld.is þekkjum líka svo vel og leggjum mikið á okkur til að miðla.
Árið 2017 fór vefur Skáld.is í loftið og er núna ein kona eftir af upprunalegri ritstjórn en hana skipa um þessar mundir Jóna G. Torfadóttir sem er annar stofnenda, Magnea Þ. Ingvarsdóttir, Soffía Auður Birgisdóttir og Steinunn Inga Óttarsdóttir sem allar hafa hugsjónir og metnað fyrir hönd Skáld.is og gefa bæði tíma og peninga til að halda vefnum úti þrátt fyrir annir á margvíslegum öðrum vettvangi.
Ritstjórn hefur í gegnum árin lagt áherslu á að halda íslenskum skáldkonum og verkum þeirra á lofti. Á vefnum Skáld.is er að finna margvíslega bókmenntaumfjöllun, ritdóma, skáldatal með æviágripi, ritaskrá o.fl, fréttir og greinar, skáldskap og viðtöl.
Það er frábært, dýrmætt og virðingarvert þegar hugsjónastarf í sjálfboðavinnu eins og það sem Skáld.is og Lestrarklefinn sinna til viðhalds bókmenntum, menningu, sögu og tungumáli fær opinbera og formlega viðurkenningu. Fólki hættir til að taka sjálfboðavinnu sem sjálfsögðum hlut en án hennar og heitra hugsjóna væri heimurinn sannarlega snauðari.
Til hamingju Lestrarklefinn!
Mynd af vef Lestrarklefans