SAGNALAND, HLJÓÐBÆKUR Í ÞÚSUNDA TALI
Sagnaland er ný og metnaðarfull íslensk hljóðbókaveita á vef og í appi. Ekki þykir vanþörf á að efna til samkeppni á þeim markaði, að mati aðstandenda veitunnar, þeirra Friðriks Salvars Bjarnasonar og Lúðvíks Páls Lúðvíkssonar. Markmiðið er einfalt að þeirra sögn: Að gera hljóðbókaheiminn betri fyrir bæði hlustendur og höfunda og halda tekjum af veitunni í landinu öndvert við Storytel.
Rithöfundasamband Íslands sendi Samkeppniseftirlitinu í ágúst í fyrra kvörtun um hugsanlega misnotkun hljóðbókafyrirtækisins Storytel á markaðsráðandi stöðu. Formaður sambandsins sagði Storytel hafa forgangsraðað sínu eigin efni á kostnað annarra bókmenntaverka.
Friðrik Salvar segir fyrirkomulagið á veitunni svipað og í tónlistargeiranum, það eru forlögin sem eigi birtingarréttinn. Enn eru það höfundarnir, bæði rithöfundar og tónlistarmenn, sem minnst bera úr býtum, en samningarnir eru þó umtalsvert hagstæðari höfundum en við Storytel, segir Friðrik Salvar.
Neytendur á hinum Norðurlöndunum búa við virka samkeppni á hljóðbókamarkaði sem hefur leitt til fjölbreyttari áskriftarleiða og aukinna gæða.
Sagnaland er hannað frá grunni fyrir íslenskar aðstæður. M.a. er í boði Bókaspjall Sveppa, Bókaklúbbur Kötlu Ársælsdóttur, bókabúð og Barnahornið þar sem listamenn eins og Steindi Jr., Emmsjé Gauti, GDRN og Sverrir Bergmann lesa barnabækur. „Barnahornið er byggt á einfaldri hugmynd: að gera kvöldsöguna aðgengilega aftur” segir í viðtali við aðstandendur veitunnar á vísi.is. En vert er að minna á að ekkert kemur í staðinn fyrir samveruna, tengslin og nándina sem myndast þegar lesið er fyrir barn í raunheimi.
Mynd af kvöldlestri: chatpgpt