SAMTÍMI SOLVEJ BALLE, SJÁLFSMYND OG VIÐTÖKUR VERKA DRÍFU VIÐAR
Nýtt tölublað Ritsins, tímarits Hugvísindastofnunar, er komið út og er það að þessu sinni helgað málvísindarannsóknum á framburði íslensku og íslensks táknmáls.
Tvær greinar standa utan þema en báðar eru þær á sviði bókmennta.
Rúmmálsreikningur (Om udregning af rumfang) eftir danska rithöfundinn Solvej Balle er viðfangsefni greinar Sigrúnar Ölbu Sigurðardóttur. Þar er dregið fram hvernig skáldverkið snertir á djúpan hátt á ýmsum málum er varða líf okkar í samtímanum, ekki síst loftslagsbreytingum og ágangi mannsins á auðlindir jarðar.
Heftinu lýkur með grein Helgu Kress um skáldskap Drífu Viðar. Helga skoðar sjálfsmyndir í skáldsögunni Fjalldalslilju og smásagnasafninu Dagar við vatnið en beinir jafnframt sjónum að viðtökum verkanna og áhrifum Drífu á aðra listamenn.
Ritstjórar þessa þemaheftis eru Ásgrímur Angantýsson og Finnur Friðriksson en aðalritstjóri Ritsins er Guðrún Steinþórsdóttir. Það er aldeilis frábært að Ritið er gefið út í rafrænum og opnum aðgangi á ritid.hi.is.
