Jóna Guðbjörg Torfadóttir∙14. nóvember 2020
Eitthvað dularfullt er á seyði!
Brynhildur Þórarinsdóttir skrifar fyrir börn og ungmenni, einkum skáldsögur en hún hefur einnig sent frá sér endursagnir á vel völdum Íslendingasögum. Brynhildur hlaut Norrænu barnabókaverðlaunin árið 2007 fyrir endursagnir sínar á Njálu, Eglu og Laxdælu og heldur hún úti vefnum www.islendingasogur.is um efni sagnanna.
Nýverið kom út bókin Dularfulla símahvarfið eftir Brynhildi og sá Elín Elísabet um að myndskreyta söguna. Um söguþráðinn segir á vef Forlagsins:
Eitthvað dularfullt er á seyði í hverfinu. Símar hverfa og finnast ekki aftur. Katla kemst á sporið og fær Hildi systur sína og Bensa vin hennar í lið með sér. Saman reyna þau að komast til botns í málinu. Rannsóknin leiðir þau á óvæntar slóðir en skyldi þeim takast að leysa gátuna?