Ný íslensk myndasaga: Glingurfugl
![](http://skald.is/rails/active_storage/blobs/eyJfcmFpbHMiOnsibWVzc2FnZSI6IkJBaHBBcXdDIiwiZXhwIjpudWxsLCJwdXIiOiJibG9iX2lkIn19--8cf2a8f998b1c7b8a6cbec5d21530d01b76070de/c9ab35_e320d382a92142c19c9e28f5f1d91e46~mv2.jpg)
Ný íslensk myndasaga, Glingurfugl, kemur út á laugardaginn, 5. maí, en hún er útskriftarverkefni Elínar Eddu í grafískri hönnun við Listaháskóla Íslands.
Elín Edda er 22 ára útskriftarnemi í grafískri hönnun við Listaháskóla Íslands en hún hefur fengist við teikningu og skriftir frá því hún man eftir sér. Árið 2014 gaf hún út myndasöguna Plöntuna á ganginum í samstarfi við Elísabetu Rún, myndasöguna Gombra árið 2016 og ljóðabókina Hamingjan leit við og beit mig sama ár.
Myndasagan Glingurfugl fjallar á ljóðrænan og hljóðlátan hátt um ferðalag tveggja fugla, Margrétar og Evu, til að endurheimta minningar þeirra og uppgötva eigið sjálf í dularfullum heimi sem er óvinveittur fuglum. Myndasagan er gefin út í 200 eintökum og inniheldur 64 blaðsíður af vatnslita- og blekmyndum. Bókin er sjálfstætt framhald myndasögunnar Gombra (2016), eftir sama höfund, en í Glingurfugli eru nýjar persónur kynntar til leiks.
Hægt er að panta eintak af þessari fallegu bók hjá Elínu Eddu í síma 849 8123 og skoða fleiri verk eftir hana á heimasíðu hennar.
Útskriftarsýning Listaháskóla Íslands opnar kl. 14.00, laugardaginn 5. maí, á Kjarvalsstöðum. Allir velkomnir.