Mynd fyrir Louise Bourgeois, vinnustofu og þögn - Steinunn Ásmundsdóttir
![](http://skald.is/rails/active_storage/blobs/eyJfcmFpbHMiOnsibWVzc2FnZSI6IkJBaHBBcjRDIiwiZXhwIjpudWxsLCJwdXIiOiJibG9iX2lkIn19--4f2cd708eb3c27827515dade918b91c33e90fdfa/c9ab35_ee92a77e14e545faa871370f947d8623~mv2.jpg)
Ljóð vikunnar að þessu sinni er eftir Steinunni Ásmundsdóttur og er sótt í nýútgefna bók hennar Áratök tímans. Ljóðabókin kom út 5. maí síðastliðinn hjá Félagi ljóðaunnenda á Austurlandi. Snemma árs árið 2016 urðu mikil tímamót í lífi Steinunnar því þá gaf hún sig aftur að skáldskapnum eftir tuttugu ára fjarveru á þeim vettvangi. Það sama ár opnaði hún hugverkavef sinn Yrkir.is sem geymir yfir 200 ljóð, bæði frumsamin og þýdd, ásamt sögum og ýmsum greinum. Á vef Steinunnar er hægt að panta eintak af ljóðabókinni.
Frekari upplýsingar um Steinunni má finna í Skáldatalinu.
![](http://skald.is/rails/active_storage/blobs/eyJfcmFpbHMiOnsibWVzc2FnZSI6IkJBaHBBcjhDIiwiZXhwIjpudWxsLCJwdXIiOiJibG9iX2lkIn19--296bdcb56e661d71289bc5c8cf6d126c88d4ad0a/c9ab35_da6e123e71524bfd9f6be7a8ed92a028~mv2_d_1677_2563_s_2.jpg)
Mynd fyrir Louise Bourgeois,
vinnustofu og þögn
(Hamborg, Þýskaland)
Athugar hvort þögnin er
ærandi stillt.
Hún skenkir þessari þögn
sköpun, tilfinningu, verk.
Rýmið þenst út
til endimarka skynjunar
og kjarnast í augasteinum.
Skerandi sársauki
ævagamallar reiði
í garð rudda og kúgara.
Þögult andóf formæðra
sem blóðá um æðar
dætra allra tíða.
Rennur enn
og inn í þagnarspegla
sem endurkasta vitneskju
í vitundina svo úr dreyrir.
Ærandi þögnin er hljóð.
Der Ort des Gedächtnisses
(Áratök tímans, útg. 2018).