Af mér - Didda
Ljóðið Af mér er eftir Diddu, Sigurlaugu Jónsdóttur, og birtist árið 1995 í ljóðabókinni Lastafans og lausar skrúfur.
Af mér
Ég flaug
lenti, var sannfærð
um að ég væri
dáin.
Var það ekki.
Og löggan yfir
andliti mínu
bað mig vera
kyrra.
Ég stóð upp.
Rak löggurnar
út úr garðinum
reif mig úr
blautum fötunum
á leiðinni upp
og bauð þeim
í hópsex.
Ég man ekki hvort
þeir vildu það
ég man ekki meir.
Og mundi ekkert í nokkra daga.
Hafði bara jörðina
á öxlunum og
sprungur í bakinu.
Mundi ekki eftir
fluginu, kveðjunni
frá sjálfri mér
ópinu úr barka mínum
nóttinni, regninu
þakinu.
En ég mundi strax
daginn eftir hvar
hassið mitt var.
Og á meðan líkami
minn stirðnaði
reykti ég.
Tveim dögum síðar
var ég komin
á barinn
drakk soldið
út á bakbrotið
og forðaðist
umfram allt
að upplifa flugið.
Því það sem var
af mér að segja
var of hrætt
of eitt
of lifandi.
En brotið.
Myndin af Diddu er sótt á vefsíðuna unifrance.org.