![](https://skald.is/rails/active_storage/representations/eyJfcmFpbHMiOnsibWVzc2FnZSI6IkJBaHBBc1VIIiwiZXhwIjpudWxsLCJwdXIiOiJibG9iX2lkIn19--49d4b606a4fe52a4d270bc164ecce3ff3f6c5385/eyJfcmFpbHMiOnsibWVzc2FnZSI6IkJBaDdDem9VYzJGdGNHeHBibWRmWm1GamRHOXlTU0lLTkRveU9qQUdPZ1pGVkRvTWNYVmhiR2wwZVdsYU9ncHpkSEpwY0ZRNkRtbHVkR1Z5YkdGalpVa2lDVXBRUlVjR093WlVPZzlqYjJ4dmNuTndZV05sU1NJSmMxSkhRZ1k3QmxRNkRHTnZiblpsY25RdyIsImV4cCI6bnVsbCwicHVyIjoidmFyaWF0aW9uIn19--025048454440a4ffbe1bfbd2ffec4bffda87ad8b/6d7981_25c62d46ddea4f03b4e452f00c9c2c00~mv2.jpg)
Anna Ólafsdóttir Björnsson
Anna Ólafsdóttir Björnsson er fædd í Reykjavík 4. júní 1952.
Hún tók stúdentspróf frá Menntaskólanum í Reykjavík 1972; stundaði nám í Myndlista- og handíðaskóla Íslands 1972-1974 og lauk BA-prófi í almennri bókmenntasögu og sagnfræði frá Háskóla Íslands 1978. Hún bætti við sig Cand. mag. prófi í sagnfræði frá sama skóla 1985 og M.Sc. prófi í tölvunarfræði 2008. Hún stundaði nám við háskólann í Lancaster á Englandi á vormisseri 2006. Meðfram öðru námi og vinnu hefur hún sótt sér frekari menntun í myndlist, einkum í Myndlistaskólanum í Reykjavík.
Anna vann við þáttagerð í útvarpi og blaðamennsku á árunum 1978-1989; sat á þingi fyrir Kvennalistann 1989-1995 og stundaði sagnfræðirannsóknir og -skrif samfellt frá 1995-2001. Hún starfaði við hugbúnaðargerð á árunum 2001-2018.
Anna hafði fengið smásögur birtar í tímaritum undir dulnefni áður en hún las fyrstu skáldsögu sína, Tvískinnung, í útvarp 1980. Á árunum 1986-1989 og 1995-1998 skrifaði hún allmargar bækur og bókakafla um sagnfræðileg efni. Einnig ritaði hún endurminningaþætti um þekkta einstaklinga og skrifaði eina ævisögu í fullri lengd, sem kom út árið 2009.
Samhliða störfum við hugbúnaðargerð skrifaði Anna sögu tölvuvæðingar á Íslandi á árunum 2015-2018 og sá um útgáfu á áður óbirtu handriti sínu af sögu Sandgerðis 2018.
Fyrsta glæpasaga Önnu kom síðan út í ársbyrjun 2021.
Auk þessa hefur Anna skrifað bókakafla, blaðagreinar og séð um útvarpsþætti um margvísleg málefni svo sem bókmenntir, sagnfræði, kvenfrelsismál og upplýsingatækni.
Ritaskrá
- 2022 Óvissa
- 2021 Mannavillt
- 2018 Tölvuvæðing í hálfa öld
- 2018 Saga Sandgerðis
- 2009 Elfa Gísla og hinar sögurnar
- 1998 Álftanes, nesið okkar. Kennsluefni
- 1998 Saga Húsmæðrakennaraskóla Íslands
- 1996 Álftaness saga
- 1987 Myndlistaskólinn í Reykjavík 1947-1987
- 1980 Tvískinningur. Útvarpssaga