SKÁLD.IS

Guðrún Auðunsdóttir er fædd 23. september 1903 í Dalsseli undir Eyjafjöllum og ólst þar upp í stórum systkinahópi.

Sem ung stúlka dvaldist hún um skeið á heimili í Reykjavík, en eftir það var hún ýmist í Reykjavík eða hjá foreldrum sínum sem hún aðstoðaði við bústörfin.

Árið 1939 giftist Guðrún Ólafi Sveinssyni. Bjuggu þau í Stóru-Mörk undir Eyjafjöllum til ársins 1984, en fluttust þá að Kirkjuhvoli í Hvolhreppi. Þau eignuðust eina dóttur árið 1939. 

Guðrún var gædd ríkri skáldgáfu og byrjaði ung að yrkja. Hún orti ljóð, þulur og stökur, en birti lítið og kom seint fram. Þulurnar Í föðurgarði fyrrum komu út árið 1956 og voru endurútgefnar árið 2000. Ljóðasafn Guðrúnar, Við fjöllin blá, var ekki gefið út fyrr en árið 1982, þegar Guðrún var komin fast að áttræðu. Um útgáfuna sáu nágrannar hennar Jón R. Hjálmarsson og Þórður Tómasson í Skógum og áttu þeir einnig frumkvæði að því að ljóðin voru gefin út. 2003 gaf dóttir hennar, Áslaug Ólafsdóttir, út bókina Þar sem lyngið óx. Ljóð og laust mál.

Minningaþáttur eftir Guðrúnu birtist í tímaritinu Goðasteini 1963.

Þórður Tómasson safnvörður á Skógum skrifaði minningargrein um Guðrúnu þar sem meðal annars má lesa:

„Ég sé Guðrúnu enn fyrir mér á verðlaunapalli á landnámshátíð Rangæinga 1974 við Merkjá í Fljótshlíð, tígulega sýnum, klædda hátíðabúningi. Þar tók hún við viðurkenningu fyrir hátíðarljóð helgað landnámi Rangárþings. Hún var mér þar líkt og tákn þeirra kvenna sem um aldir hafa glætt og haldið í loga ást á ljóðlist og menningu og gefið æsku landsins í arf."

Sr. Sigurður Einarsson í Holti skrifaði grein um skáldskap Guðrúnar Auðunsdóttur í tímaritið Heima er best árið 1963. Ritgerðin var endurprentuð í ljóðasafni henni 1982.

Guðrún lést á Selfossi 26. október 1994.

 

Heimildir:

• Helga Kress. 2001. „Guðrún Auðunsdóttir (1903-1994)“, bls. 280. Stúlka. Ljóð eftir íslenskar konur.  Bókmenntafræðistofnun Háskóla Íslands, Reykjavík.
• Þórður Tómasson. Guðrún Auðunsdóttir, minningargrein. Morgunblaðið 5. nóvember 1994, bls. 38.