SKÁLD.IS

Jóhanna Halldóra Sveinsdóttir fæddist í Reykjavík 25. júní 1951.

Hún lauk stúdentsprófi frá Menntaskólanum við Hamrahlíð 1971 og tók próf í ensku og latínu frá Háskóla Íslands vorið 1972. Einnig lauk hún 2. stigi í frönsku fyrir útlendinga, Diplome d'études francaises, í Montpellier í febrúar 1973. Jóhanna lauk BA prófi frá HÍ með íslensku sem aðalgrein og latínu og ensku sem aukagreinar árið 1979. Þá lauk hún fyrri hluta doktorsprófs í bókmenntafræði við Université de Provence árið 1980.

Jóhanna lagði stund á íslenskukennslu við Menntaskólana við Tjörnina, á Ísafirði og við Hamrahlíð með hléum á árunum 1972-1991. Hún var blaðamaður um árabil og annaðist prófarkalestur fyrir ýmsa aðila um langt skeið.

Eftir Jóhönnu liggja viðtalsbækur og matreiðslubækur, bók um breytingaskeið kvenna og ljóðabækur, auk þess sem hún þýddi skáldsögur, ljóð, barnabækur og unglingabækur úr frönsku og ensku. Þá bjó hún til útgáfu ýmis bókmenntaverk, gömul og ný, sem ætluð eru til kennslu í íslensku í grunn- og framhaldsskólum. Um skeið sá hún um bókmenntagagnrýni fyrir Ríkisútvarpið og DV, Tímarit Máls og menningar og Helgarpóstinn. Jóhanna skrifaði einnig fjölda greina fyrir blöð og tímarit og annaðist þáttagerð fyrir Ríkisútvarpið.

Eftirlætisviðfangsefni Jóhönnu í fjölmiðlum var jafnan matargerð og skrifaði hún undir nafninu Matkrákan. Á síðustu misserum ævi sinnar sökkti Jóhanna sér æ meir í heimspeki og ljóðagerð.

Jóhanna bjó lengst af í Reykjavík. Um skeið dvaldi hún á Ítalíu og nokkra vetur í Frakklandi á námsárum sínum. Frá því í byrjun árs 1993 var hún búsett í París. Jóhanna lést í hörmulegu slysi á Fagurey í Frakklandi (Belle-Ile-en Mer, úti fyrir strönd Bretagneskaga) 8. maí 1995.

Dóttir Jóhönnu er Álfheiður Hanna Friðriksdóttir, f. 1970.

Mynd: Vera, 5.tölublað, 01.11.1995, bls 42