![](https://skald.is/rails/active_storage/representations/eyJfcmFpbHMiOnsibWVzc2FnZSI6IkJBaHBBbnNJIiwiZXhwIjpudWxsLCJwdXIiOiJibG9iX2lkIn19--606c72324fcacccf8fc2f15326cf85a664f28e12/eyJfcmFpbHMiOnsibWVzc2FnZSI6IkJBaDdDem9VYzJGdGNHeHBibWRmWm1GamRHOXlTU0lLTkRveU9qQUdPZ1pGVkRvTWNYVmhiR2wwZVdsYU9ncHpkSEpwY0ZRNkRtbHVkR1Z5YkdGalpVa2lDVXBRUlVjR093WlVPZzlqYjJ4dmNuTndZV05sU1NJSmMxSkhRZ1k3QmxRNkRHTnZiblpsY25RdyIsImV4cCI6bnVsbCwicHVyIjoidmFyaWF0aW9uIn19--025048454440a4ffbe1bfbd2ffec4bffda87ad8b/6d7981_5d979436d726469ba2c77441e236f579~mv2.jpg)
Karítas Hrundar Pálsdóttir
Karítas Hrundar Pálsdóttir er fædd árið 1994.
Karítas er doktorsnemi í ritlist við University of East Anglia í Bretlandi. Áður lauk hún MA-gráðu í ritlist og BA-gráðu í íslensku með japönsku sem aukagrein frá Háskóla Íslands. Hún hefur búið í lengri og skemmri tíma í Danmörku, Bandaríkjunum, Japan, Bretlandi og á Spáni og hefur því öðlast töluverða reynslu af tungumálanámi. Karítas hefur jafnframt komið að kennslu íslensku sem annars máls við Háskóla Íslands og íslensku sem erlends máls við Waseda háskóla í Tókýó.
Fyrsta bók Karítasar er örsagnasafnið Árstíðir – sögur á einföldu máli sem kom út hjá Unu útgáfuhúsi í janúar 2020. Verkið samanstendur af 101 örsögu sem fjalla um siði og venjur á Íslandi. Safnið er fyrsta sinnar tegundar á Íslandi þar sem sögurnar eru allar skrifaðar sérstaklega fyrir lesendur með íslensku sem annað mál (á getustigi A2 til B1 samkvæmt Evrópurammanum). Bókin hefur notið mikilla vinsælda og verið kennd á ýmsum skólastigum á Íslandi sem og erlendis.
2022 kom Dagatal sem er sjálfstætt framhald af Árstíðum. Smásagnasafnið Það er alltaf eitthvað inniheldur þrjár sögur eftir Karítas. Auk þess hafa sögur eftir hana birst í tímaritum á borð við Tímarit máls og menningar.
Ritaskrá
- 2023 Árstíðir - verkefnabók
- 2022 Dagatal - sögur á einföldu máli
- 2020 Árstíðir – sögur á einföldu máli
- 2019 Það er alltaf eitthvað (ásamt ellefu öðrum höfundum)
Verðlaun og viðurkenningar
- 2022 Viðurkenning Íslenskrar málnefndar fyrir sögur á einföldu máli
- 2020 Styrkur úr Jafnréttissjóði Íslands