SKÁLD.IS

Hulda Sigrún Bjarnadóttir er fædd 2. febrúar 1971. Hún lærði sálfræði og bókasafnsfræði og er búsett í Reykjavík.

Hulda byrjaði að skrifa skáldskap á ensku og sendi frá sér fjórar unglingabækur undir höfundarnafninu Rune Michaels. Bækurnar heita Genesis Alpha, The Reminder, Nobel Genes og Fix me. Þær hafa einnig komið út á þýsku, frönsku, portúgölsku, kóresku og mandarin. Árið 2010 hlaut bókin Genesis Alpha bæði belgísku verðlaunin Priz Farniente og frönsku lesendaverðlaunin Gayant Lecture. Þá var sú bók einnig valin á lista borgarbókasafn New York bókar yfir bestu unglingabækurnar árið 2008.  

Í samvinnu við Arndísi Þórarinsdóttur skrifaði Hulda Sigrún bókina Blokkin á heimsenda sem kom út árið 2020. Sagan gerist á óræðum stað en í verkinu er tekist á við ýmis mikilvæg málefni eins og einmanaleika og einangrun, mikilvægi þess að vera í samskiptum við aðrar manneskjur. Loftslagsváin er einnig til umfjöllunar en lögð er áhersla á að mannskepnan komi vel fram við náttúruna og vinni saman að því að vernda hana. Bókinni var afar vel tekið en hún hlaut bæði Íslensku bókmenntaverðlaunin og Barnabókaverðlaun Guðrúnar Helgadóttur.