SKÁLD.IS

Konur skrifa um konur sem skrifa

Freyja “Sparkle” Möller

Freyja “Sparkle” Möller (áður Sindri “Sparkle” Freyr) er fædd 18. febrúar 1997. Hún lauk stúdentsprófi í Menntaskólanum í Hamrahlíð. Eftir það lauk hún fornámi í myndlist og diplómagráðu í málaralist frá Myndlistaskólanum í Reykjavík og svo BA í grafískri hönnun frá Listaháskóla Íslands. Hún skilgreinir sig sem fjöllistakonu og skapar því í fjölmörgum miðlum og á það til að blanda þeim saman.

Listaferill Freyju byrjar í Hinu Húsinu þar sem hún sýndi sjö sýningar á þremur árum í Gallerí Tukt. Þar kynnist hún fyrsta rithóp sínum sem seinna gaf út bókina Sófar árið 2016. Þaðan fer Freyja í gegnum myndistarnám og uppgötvar hæfileika sinn í að segja sögur. Lokaverkefni hennar á málarabraut var kvikmyndin Opening Up sem vann til verðlauna á Reykjavík Fringe Festival. 

Árið 2020 leiða þessi verðlaun af sér stórt hlutverk í auglýsingarherferðinni Allir Úr! frá Nova þar sem Freyja uppgötvar ást sína á því að leika. Því miður uppgötvar hún fljótt að það eru engin hlutverk fyrir trans fólk, hvorki í sjónvarpi né á sviði. Freyja gerist því  uppistandari sem er líklegast sú listgrein sem hún er hvað þekktust fyrir. Þar hlaut hún verðlaun fyrir tvo einleiki, annars vegar You're lucky he was Nice, sem fjallar um hatursglæpi, og hins vegar A man named Fea sem snýst um trans heilbrigðiskerfið á Íslandi.
 
Árið 2024 fær Freyja hlutverk í leikritinu Skammarþríhyrningnum í Borgarleikhúsinu en hún tók einnig þátt í að skrifa verkið. Það var tilnefnt til fjögurra Grímuverðlauna og vann ein. Eftir það fór Freyju að bjóðast ýmis hlutverk og starfar hún mikið í leikhúsi í dag. 

Skrif hafa alltaf spilað stóran þátt í verkum Freyju hvort sem um er að ræða að skrifa brandara, leikrit eða sögur. Í stað þess að treysta á útgefendur, sem sögulega séð hafa haft lítinn áhuga á hinsegin bókmenntum, fór hún að læra grafíska hönnun til þess að geta sett upp sínar eigin bækur og gefið út í jaðar-listasamfélögum. Þannig stóð hún að fjölmörgum smáritum og ljóðabókum, t.d.  Grímunni: Grindr ljóðum sem hlaut frábæra dóma. Fyrsta bók Freyju sem fékk útgefanda er A Pocket Guide to Pride Flags en Microcosm Publishing sá um útgáfu sumarið 2026.

Ritaskrá

  • 2026: A Pocket Guide to Pride Flags: An Illustrated History of Queer Community Symbols
    2025: Gríman: Grindr ljóð
    2025: KVÁR ER ÉG!
    2022: 70 skipti sem ég þurfti að vera sæt
    2016: Sófar

    Leikverk og uppistand:
  • 2026: Sex ed: Kynfræðslukarnival fyrir fullorðna
    2025: Skammarþríhyrningurinn (ásamt fleirum)
    2024: Kyn/Líf
    2024: What is Kink? Baby Please Hurt Me!
    2023: A man named Fear
    2022: You’re lucky he was nice
    2020: Opening up