Guðrún Steinþórsdóttir∙10. október 2021
Afmælisbarn dagsins - Ingunn Snædal
Ljóðskáldið Ingunn Snædal fagnar fimmtugsafmæli í dag, 10. ágúst, og óskum við henni hjartanlega til hamingju með daginn. 26 ár eru síðan fyrsta ljóðabók Ingunnar, Á heitu malbiki, kom út en alls hefur hún sent frá sér fimm ljóðabækur. Ljóð skáldkonunnar hafa alla jafna vakið mikla athygli og hlotið góðar viðtökur en önnur bók hennar, Guðlausir menn, hugleiðingar um jökulvatn og ást, hlaut Bókmenntaverðlaun Tómasar Guðmundssonar og var auk þess tilnefnd til Íslensku bókmenntaverðlaunanna.
Fyrir sex árum kom út heildarsafn ljóða Ingunnar ásamt áður óbirtum ljóðum. Eins og kemur fram í grein Steinunnar Ingu Óttarsdóttur um ljóðasafnið yrkir skáldkonan gjarnan um náttúruna, ferðalög, ást og ástleysi en í ljóðum hennar er ískrandi írónían sjaldnast langt undan. Um skáldskap Ingunnar segir Steinunn Inga meðal annars:
Hversdagsleg ljóðræna og ærlegar tilfinningar eru aðalsmerki Ingunnar, hún yrkir ekki um kvenlegan veruleika eða kvenmyndir eilífðarinnar og er hvorki róttækt, femínískt né erótískt skáld né yrkir hún um samkynhneigðar ástir. Skáldskapur hennar er allra; skýr, knappur og hnyttinn og yrkisefnin sammannleg. Hún er lárviðarskáld og landsbyggðartútta, heimskona dregin upp úr dalalífi, með heitar tilfinningar sem hún hikar ekki við að flíka, um leið og hún breiðir yfir sársaukann með kaldhömruðu glotti.
Auk þess að vera hnyttið og skemmtilegt ljóðskáld er Ingunn afbragðsþýðandi en hún þýðir jöfnum höndum reifara og heimsbókmenntir og allt þar á milli.
Í tilefni dagsins rifjum við upp ljóð úr þremur bókum Ingunnar og vonum að ekki sé langt að bíða eftir næstu ljóðabók.
ævintýri
fyrir þig
myndi ég gjarna
bera inn sólskin
í botnlausum potti
allan daginn
kreista sólina
svo gulir taumar
rynnu um þig allan
útilega
tvö stór ský á
fleygiferð um
bláglóandi himin
breytast í bjöllu
í bíl í kassa í andlit
í skakkt hjarta …
hrekk upp úr
hugsunum mínum við
kitlandi tilfinningu í eyra
sný höfði og
þarna liggur þú við
hlið mér í neongrænu
grasi og heldur á
löngu puntstrái
ættareinkenni
en leiðinlegt fyrir
ykkur systurnar
að vera ekki háar
og grannar eins og
mamma ykkar
sagði amma alltaf
elskan mín
þú ert eins og vörubílstjóri
um axlirnar
er einhver hissa þótt
ermalausir kjólar
finnist ekki í mínum fataskáp
