TRÖLLIÐ OG SVARTA KISA, OG FLEIRA TÝNT
Margrét Pálína Lilja Jónsdóttir hét kona, sem kynnti sig sem Margréti J. Björnsson, oftast kölluð Lilla. Fædd í Reykjavík 1920 og lést 1975. Hún lærði til kennara og kenndi um hríð við Laugarnesskóla í Reykjavík en frá 1961 við Hlíðaskóla til dauðadags. Aðalkennslugreinar hennar voru teikning og föndur, auk þess sem hún kenndi leikræna tjáningu. Á því sviði samdi hún nokkur brúðuleikrit sem jafnan voru sett upp í skólanum. Skrifaði hún bæði handrit, gerði brúður, búninga og leiktjöld. Einhver þeirra voru sýnd í barnatíma sjónvarpsins.
Tvær bækur sendi hún frá sér a.m.k. en aðeins aðra þeirra er að finna í Gegni, Tröllið og svarta kisa. Árið 2006 var gert verkefnahefti eftir bókinni. Hin er tilgreind í æviágripi í Kennaratali, Hvað heitir dúkkan mín? Og á eina til viðbótar, Ása sjö ára, er minnst í minningargrein um Margréti eftir Ármann Kr. Einarsson.
Fátt er nú til minningar um feril þessarar konu og flest sem hún skrifaði er týnt. En nú fær Margrét sess í skáldatalinu.
