TAROTSPIL KRISTÍNAR RÖGNU
Myndlistarkonan og rithöfundurinn Kristín Ragna Gunnarsdóttir hefur gefið út ný tarotspil með frábærum teikningum.
Kristín hefur getið sér gott orð sem höfundur barna- og ungmennabóka, nú síðast fyrir þríleikinn Nornasaga (2018-2021). Þá þekkja eflaust allir Njálurefilinn sem Kristín teiknaði og var saumaður af ótal höndum. Þá hefur hún myndskreytt fjölda bóka, sínar eigin og annarra.
Kristín Ragna hefur í tvígang hlotið Íslensku myndskreytiverðlaunin sem kennd eru við Dimmalimm, enda eru myndir hennar með eindæmum skemmtilegar.
Það verður gaman að spá í spilin með teikningum Kristínar Rögnu og í því sambandi er vert að geta þess að nýkomin er út á íslensku bókin Lesið í tarot eftir Alison Davis í þýðingu Hafsteins Thorarensen og í kynningu á bókinni segir:
Hvert tarot-spil hefur sögu að segja og er þrungið táknrænni merkingu. Í þessari fallegu bók, sem hentar byrjendum jafnt sem lengra komnum, glæðir sérfræðingurinn Alison Davies söguna að baki hverju spili lífi.
Fylgdu Fíflinu á ferðum sínum um Major Arcana þar sem það fetar sig áfram á lífsins vegi og hittir fyrir lykilpersónur á borð við Einsetumanninn, Dauðann og Æðstuprestynjuna. Lærðu sögurnar að baki sortanna fjögurra í Minor Arcana. Uppgötvaðu hvernig systur þrjár risu til valda í sort myntanna og hvernig hugmynd sem breytti heiminum fæddist í sort vandanna.
Sögurnar í bókinni og þemu hvers spils nýtast þér til að fræðast um leyndardóma tarot og dýpka skilning þinn svo að þú getir tileinkað þér spekina sem spilin búa yfir.
