SKÁLD.IS

Skáld.is frumbirtir tvö ljóð eftir Eyrúnu Ósk Jónsdóttur skáldkonu, leikstjóra og leikara. Eyrún Ósk byrjaði snemma að skrifa og gaf út sína fyrstu ljóðabók aðeins 16 ára gömul. Síðan þá hefur hún gefið út margar ljóðabækur, skáldsögur og myndskreyttar barnabækur og hlotið fjölda verðlauna og viðurkenninga fyrir.

 

Fyrra ljóðið fjallar á afar ljóðrænan hátt um hvernig goshræringar hreyfa við manneskjunni svo að hún og jörðin eru eitt. Það er öllu stilltara seinna ljóðið sem hverfist um hamingjuna sem fæst á því augnabliki þegar staldrað er við. 

 

 

 

Heyri spennuna magnast

eins og núningur á taugakerfið

 

drunurnar æða gegnum loftið

og skella á hljóðhimnunni

svo fer allt að skjálfa

 

og spennan sem áður dvaldi í jörðu

dvelur nú á hörundinu

í beinum og vöðvum og vefjum

og svo fer ég að skjálfa

og við skjálfum saman

jörðin og ég

 

og spennan eykst og vex

og bráðum förum við að gjósa.

 

 

Allar heimsins áhyggjur

eru að sinna öðru.

Staldra við

mæti sjálfri mér

og þarna í augnablikinu

er hamingjan.