SKÁLD.IS

FYRSTA LJÓÐABÓK EYRÚNAR INGADÓTTUR

Eyrún Ingadóttir sendi frá sér sína fyrstu ljóðabók síðastliðið haust. Bókin hefur titilinn UPPHAFSHÖGG og undirtitilinn: Ljóð um listina að spila golf. Ekki er þó víst að taka eigi þennan undirtitil of alvarlega - það kann að vera að í golf-íþróttinni sé fólgin táknsaga fyrir lífið sjálft og jafnvel ástina. Það verður þó hver lesandi að gera upp við sjálfan sig.

Ljóðabók Eyrúnar er óvenju glæsileg í formi og ytri búnaði. Pappír er vandaður og allar síður með litprentuðum myndum sem ljóðtextinn er prentaður á. Myndirnar gætu verið af golfvelli - sléttum flötum og sandgryfjum - eða þær gætu hver og ein verið abstrakt-listaverk. Heiðurinn af myndunum á Gabríel Benedikt Bachmann.

Ljóð Eyrúnar eru hugvekjandi og segja sögu sem gaman er að pæla í. Eitt þeirra ber yfirskriftina ÁSTIN Á NÍTJÁNDU og er svona:

þú sem hélst

að allt væri búið

þegar drifhöggið

geigaði á sautjándu braut

 

fórst þess í stað

holu í höggi

á þeirri nítjándu

 

vissir ekki

að hægt væri

að spila vel

utan vallar

 

fannst

nýjan rástíma

annan félaga

á leikvelli lífsins