ORÐABÖND - BÓK SEM BINDUR SAMAN KONUR OG ORÐ
Orðabönd er ný bók sem kom út þann 19. júní – á Kvenréttindadaginn og er sú dagsetning engin tilviljun og vel við hæfi þar sem Orðabönd er kvennaútgáfa frá upphafi til enda: skrifuð af konum, hönnuð af konu, ritstýrð af konu, yfirlesin af konu – jafnvel letrið er hannað af konu.
Þetta er bók sem sprettur upp úr samveru og samræðu fimm kvenna sem hittust hjá skáldkonunni Vigdísi Grímsdóttur í heimsfaraldri, drukku í sig orðin hennar með kaffibollanum og ákváðu í kjölfarið að gefa sínum eigin orðum frelsi.
Eftirmálann skrifar Vígdís sem lýsir bókinni sem gjöf til allra sem njóta þess að lesa:
Bókin skannar litróf lífsins; fegurðina, ljótleikann, gleðina, sorgina, allt þetta og miklu meira í dásamlegri fléttu alvarleika og húmors. Eftir lesturinn gengur maður í fjöru, hugleiðir óvænt formið og spennuna í tungumálinu, sér þá skyndilega glitta í eitthvað milli steina og kemur auga á perlu í opinni skel - og alveg eins og í ævintýri - starir maður í perluna og sér að inní henni, með örfínu letri, stendur Orðabönd. Ótrúlegt en alveg dagsatt. Bókin er gjöf til allra sem njóta þess að lesa…
Í bókinni eru 51 smásaga, örsögur og ljóð – eftir þær Brynhildi Auðbjargardóttur, Hrefnu Róbertsdóttur, Hrund Apríl Guðmundsdóttur, Steinunni Þorsteinsdóttur og Sveinbjörgu Sveinsdóttur. Ritstjóri er Guðrún Steinþórsdótir.
Orðabönd er bók sem bindur saman orð og fimm konur – hugrökk, óvægin, heiðarleg og undurfalleg biður hún fólk að staldra við og njóta orðanna.
Hægt er að nálgast bókina með því að heimsækja Facebook-síðu hennar eða senda póst beint á kapurnar5@gmail.com
Hér er hægt að lesa viðtöl við höfundana sem birtust á Visir og Lifðu núna.