SKÁLD.IS

Blæja hvítra himinljósa

Skáld dagsins er Ragnheiður Magnúsdóttir 1897 frá Hvítárbakka er ný í safninu okkar. Hér eru nokkur ljóð eftir hana.

         Blæja hvítra himinljósa

Blæja hvítra himinljósa

hefur lagst í vetrar spor.

Gulnuð visnuð grösin frjósa,

grösin, sem ég kyssti í vor.

 

Þegar fanna fötum klæddust

fögru vetrarblómin öll,

vonir, sem í fyrra fæddust,

fólust undir kaldri mjöll

 

Himinrósir hverfa allar,

hýrnar blær, er sólin skín.

En hvernær losna úr læðing mjallar

ljúfu vonarblómin mín?

 

Ótryggð

 

Í vor, þegar sólgyðjan klappaði á kinnar

og kossana´ á enni mitt hrynja lét

þá grét e´g af ótryggð elskunnar minnar,

- í iðgrænu túninu lá ég og grét.

 

Í haust, þegar logar á arninum inni

og úti er grasfölvinn hulinn af snæ,

- nú hlæ ég að eigin ótryggð minni,

í ískaldri fjörunni stend ég og hlæ.