Jóna Guðbjörg Torfadóttir∙15. apríl 2026
ÚTGÁFUFÖGNUÐUR: Í HÆFILEGU MAGNI
Á morgun fagnar Heiða Vigdís Sigfúsdóttir útkomu nýjustu bókar sinnar, Í hæfilegu magni.
Þetta er annað verk Heiðu Vigdísar, sem hún stendur ein að. Það fyrra er skáldsagan Getnaður (2022) en handrit hennar bar sigur úr býtum í handritasamkeppni Forlagsins, Nýjar raddir.
Skáldsagan Getnaður er kynnt svo:
Getnaður eftir Heiðu Vigdísi Sigfúsdóttur inniheldur hispurslausar og bráðfyndnar ástarsögur um þrítugt fólk í Reykjavík sem fléttast saman á óvæntan hátt. Djammið dunar en fullorðinspressan fer sívaxandi: Íbúð, barn og bíll vofa yfir en er tímabært að búa til barnabarn handa mömmu þegar ekki er einu sinni hægt að vera sammála um sjónvarpsdagskrána? Og hver ber ábyrgð á öllu sæðinu sem streymir linnulaust fram í miðborginni um helgar?
Fátt segir enn af efni nýju skáldsögunnar, Í hæfilegu magni, og verður því spennandi að fá hana í hendur.
Útgáfuhófið verður haldið í bókabúð Forlagsins við Fiskislóð og hefst dagskrá kl. 17:00. Þar mun skáldkonan lesa upp úr bókinni og árita hana á útgáfutilboði. Lofað er léttum veitingum, búbblum og magadansi.