SKÁLD.IS

Ljóð Bjargar Jónsdóttur

Ljóð Bjargar í sýnisbók rangæskrar ljóðagerðar á 20. öld

 

Holtsnúpur

 

Hver er hinn djarfi, stóri og sterki,

er stendur við alfaraleið.

Með litrófi allt í ljóssins merki

og lokkandi töfraseið.

Dulur á svip, er dökknar rjóður

og dimmir um tindaskörð.

Það er Holtsnúpur, hollur og góður,

sem heldur um byggðina vörð.

 

Ef gengur þú einn um götuna þreyttur,

er geymir þín fyrri spor,

í huga þínum er heimurinn breyttur

og horfið þitt bernsku vor,

þá líttu´ upp í brekkuna, ljósvakinn gróður

ljómar þar enn móti sól.

Það er Holtsnúpur, hollur og góður,

sem hvíld þér býður og skjól.

 

En þegar lýkur lífsins árum

og lagt er í hinztu för,

þú vindur upp segl, er vakir á bárum,

og veltur hinn smái knör,

og tekur mið af tindunum hljóður

á tindrandi stjarna her.

Það er Holtsnúpur, hollur og góður,

til himins sem bendir þér.

 

Mosinn

 

Ég er frjóið, sem festi rætur

undir fönnum á öræfaslóð.

Ég er mýktin við mannsins fætur,

er mæðir hann gangan hljóð.

Ég er grænkan, sem geislanum móti

glitrar í himinsins veig.

Ég er mosinn, sem grær á grjóti,

gullið í aldanna sveig.

 

Á fornum slóðum

 

Þar sem lækurinn niðar og lyngið grær

og laufvangann strýkur morgunblær

og yndistöfrum á engið slær

og álfaborgir á hjöllum.

Þar nam mín sál vorsins söngvamál

við sólris á norðurfjöllum.

 

Því leita ég enn á ljúfa slóð

um ljósar og fagrar nætur

og hlýði á straumsins léttu ljóð,

sem lágtónum hlær og grætur.

Þótt grói yfir spor, hið gullna vor

geymist við hjartarætur.

 

Jól

 

Í húsi mínu er hlýtt og rótt,

það húmar og líður á daginn.

Á kerti mínu ég kveiki hljótt,

því komin er heilög jólanótt

og bíð þér, Jesú , í bæinn.

 

Ljóðin hennar Björgu birtust í bókinni ,,Ljóð Rangæinga" 1968 sýnisbók rangæskrar ljóðagerðar á 20. öld

þar sem 68 höfundar eiga ljóð í bókinni. Goðsteinsútgáfan Skógum.

 

https://skald.is/skaldatal/563-bjorg-jonsdottir