Jónína Michaelsdóttir
Jónína Kristbjörg Michaelsdóttir rithöfundur og blaðamaður fæddist 14. janúar 1943. Hún var fædd og uppalin í Reykjavík. Báðir foreldrar hennar voru ættaðir frá Seyðisfirði en þau létust með fárra ára millibili frá barnahópnum og ung tók Jónína ábyrgð á heimilinu. Árið 1961 giftist hún Sigþóri Jóni Sigurðssyni og bjuggu þau fyrst á Gufuskálum á Snæfellsnesi. Fjölskyldan flutti árið 1976 til Hafnarfjarðar og bjó þar til æviloka. Jónína og Sigþór eignuðust þrjú börn.
Jónína starfaði sem blaðamaður á Vísi 1977-1980 og tók ótal viðtöl um dagana. Þá var hún framkvæmdastjóri samtakanna Viðskipti og verslun 1980-1983 og vann við markaðsráðgjöf í Iðnaðarbanka Íslands 1983-1986. Jónína var aðstoðarmaður forsætisráðherra 1987-1988, formaður Bókmenntakynningarsjóðs, sat í ýmsum stjórnum, m.a. hjá Tónlistarskólanum í Reykjavík og Ríkisspítölum. Jónína gegndi margvíslegum trúnaðarstörfum fyrir Sjálfstæðisflokkinn. Hún sat meðal annars í skipulagsnefnd og var formaður fræðslu- og útbreiðslunefndar. Einnig sat hún í framkvæmdastjórn, miðstjórn og flokksráði Sjálfstæðisflokksins. Hún ritaði fjölda bókarkafla, tímaritsgreina og pistla á visir.is, þann síðasta árið 2012.
Jónína vann sjálfstætt við markaðsmál og ritstörf og við þáttagerð í sjónvarpi og útvarpi. Jónína skrifaði af næmni og list ævisögur sterkra kvenna eins og Þuríðar Pálsdóttur óperusöngkonu, Tove Engilberts, Sesselju Sigmundsdóttur og Karólínu Lárusdóttur listmálara.
Jónína lést 17. maí 2021.
Mynd: Vísir
Ritaskrá
- 2015 Mér leggst eitthvað til. Sagan um Sesselju Sigmundsdóttur og Sólheimum
- 2000 Dagur við ský. Fólk í íslenskri flugsögu
- 1994 Áhrifamenn
- 1993 Karólína. Líf og list Karólínu Lárusdóttur listmálara
- 1993 Milli sterkra stafna. Fólkið hjá Eimskip
- 1989 Eins manns kona. Minningar Tove Engilberts
- 1986 Líf mitt og gleði. Minningar Þuríðar Pálsdóttur söngkonu
