![](https://skald.is/rails/active_storage/representations/eyJfcmFpbHMiOnsibWVzc2FnZSI6IkJBaHBBa2dWIiwiZXhwIjpudWxsLCJwdXIiOiJibG9iX2lkIn19--3f7669acf7ee06071f386478a54e5f2a3aa6d0cb/eyJfcmFpbHMiOnsibWVzc2FnZSI6IkJBaDdDem9VYzJGdGNHeHBibWRmWm1GamRHOXlTU0lLTkRveU9qQUdPZ1pGVkRvTWNYVmhiR2wwZVdsYU9ncHpkSEpwY0ZRNkRtbHVkR1Z5YkdGalpVa2lDVXBRUlVjR093WlVPZzlqYjJ4dmNuTndZV05sU1NJSmMxSkhRZ1k3QmxRNkRHTnZiblpsY25RdyIsImV4cCI6bnVsbCwicHVyIjoidmFyaWF0aW9uIn19--025048454440a4ffbe1bfbd2ffec4bffda87ad8b/moa%5B1519%5D.jpg)
Móheiður Hlíf Geirlaugsdóttir
Móheiður Hlíf Geirlaugsdóttir er fædd 17. mars 1976 í Aix-en-Provence í Suður-Frakklandi og sleit þar barnsskónum til 11 ára aldurs. Móheiður flutti sextán ára í Norðurmýrina og varð stúdent frá Menntaskólanum í Reykjavík 1996. Hún fór þá til Parísar og lagði stund á klassísk fræði í Sorbonne í einn vetur. Móheiður dvaldi stutt við í Frakklandi þetta sinnið en fór heim í Háskóla Íslands að lesa heimspeki. Árið 2002 útskrifast hún með BA-próf í heimspeki en lokaritgerð hennar fjallar um siðfræði Simone de Beauvoir.
Móheiður hefur unnið lengi sem leiðsögumaður en árið 2011 útskrifast hún með MA-próf úr Háskóla Íslands í þýðingafræði, lokaritgerðin var þýðing á siðfræðiritinu Pyrrhos og Kíneas eftir Simone de Beauvoir var gefið út í Lærdómsritaröð Hins íslenska bókmenntafélags 2018. Móheiður hefur undanfarin ár starfað mestmegnis sem sjálfstætt starfandi þýðandi en einnig við sýningarvörslu í Einarssafni, Þjóðminjasafninu og Safnahúsinu.
Móheiður hefur búið í Berlín og nú nýlega í þrjú ár í Edinborg, Skotlandi. Hún starfar nú sem bókavörður á Bókasafni Seltjarnarness með ritstörfum. Þá hefur hún skrifað ljóð, greinar, viðtöl og bókmenntarýni í blöð og á bloggsíður. Móheiður hefur einnig verið að reka bókabúð úr bílskúrnum sínum frá 25. ágúst 2020, Kanínuholan – fornbókaveröld (https://www.facebook.com/kaninuholan/). Mikill hluti bókakosts holunnar er bókasafn föður hennar Geirlaugs Magnússonar skálds og þýðanda með meiru. Í kanínuholunni var haldin Bókmenntahátíð alþýðunnar á Menningarnótt 2022 og „off-venue“ viðburður af Bókmenntahátíð í Reykjavík 2023.
Móheiður er gift og á tvær dætur og kött.
Ritaskrá
- 2021 Gríseyjar - ósýnilegt landslag
- 2016 Flygildi
Þýðing
- 2018 Pyrrhos og Kíneas eftir Simone de Beauvoir