SKÁLD.IS

Steinunn Ásmundsdóttir, rithöfundur, ljóðskáld og blaðamaður, fæddist árið 1966 í Reykjavík þar sem hún ólst upp.

Heimshornaflakk, ritstörf, blaðamennska, starf að náttúruvernd og landvarsla voru helstu viðfangsefni hennar fram undir þrítugsaldurinn.

Árið 1996 kom Steinunn heim eftir búsetu í Þýskalandi og flutti til Egilsstaða, þar sem hún bjó í ríflega tvo áratugi, stofnaði fjölskyldu og starfaði lengst af sem blaðamaður og ljósmyndari Morgunblaðsins og síðar sem ritstjóri héraðsfréttablaðsins Austurgluggans og fréttavefs Austurfréttar. Hún lagði svo blaðamennsku á hilluna að sinni og einbeitti sér þess í stað að eigin skapandi skrifum á ný.

Á árabilinu 1989 til 1996 sendi Steinunn frá sér þrjár ljóðabækur. Árið 2016 opnaði hún hugverkavef sinn ORÐLIST.is þar sem bróðurpartur eldri verka hennar er birtur. Síðan hafa komið út fjórar ljóðabækur, sannsaga og skáldsaga.

Steinunn settist að nýju að í Reykjavík árið 2019. Hún er móðir tveggja ungmenna, starfar sem blaðamaður og hefur verið félagi í Rithöfundasambandi Íslands frá 1992.