Anna S. Snorradóttir
Anna Sigrún Snorradóttir var fædd 16. október 1920. Foreldrar hennar voru Snorri Sigfússon, skólastjóri og námsstjóri, og Guðrún Jóhannesdóttir, húsfreyja á Flateyri og Akureyri.
Anna lauk stúdentsprófi frá Menntaskólanum á Akureyri árið 1942. Hún stundaði síðan nám í Englandi og í Svíþjóð á árunum 1945-47 og var meðal annars í starfsnámi hjá BBC í London.
Anna var kennari við Barnaskóla Akureyrar 1942-1945. Hún veitti fræðsludeild KEA forstöðu 1948-1949.
Anna var búsett í Kaupmannahöfn á árunum 1952-1958 og vann við skrifstofustörf hjá Flugfélagi Íslands 1952-1954. Lengst starfaði hún hjá Ríkisútvarpinu, 1959-1970,og vann aðallega við dagskrárgerð fyrir börn. Hún hefur flutt margs konar útvarpsefni síðan.
Anna vann við stjórnunarstörf hjá Sólarfilmu frá 1972 þar til hún lét af störfum vegna aldurs.
Árið 1989 setti hún saman kver um Mark Watson, velunnara íslensa hundakynsins og Glaumbæjar í Skagafirði sem er elsta byggðasafn landsins.
Anna skrifaði reglulega greinar í blaðið Dag á Akureyri (1942-1952), einnig tvö ár í Samvinnuna og var í 7 ár í útgáfustjórn Húsfreyjunnar. Hún þýddi barnabækur (e.t.v nafnlaust, upplýsingar vantar) og gaf út nokkrar ljóðabækur.
1949 giftist Anna Birgi Þórhallssyni, fyrrverandi framkvæmdastjóra og eiganda Sólarfilmu. Þau eignuðust þrjú börn.
Anna lést árið 2009.
Ritaskrá
- 2019 Nokkur ljóð
- 2008 Í hentugum tíma
- 2006 Fimmtíu limrur
- 2004 Kona í rauðri kápu
- 1993 Bak við auga
- 1990 Þegar vorið var ungt
- 1989 Mark Watson og Glaumbær
