SKÁLD.IS

Konur skrifa um konur sem skrifa

Soffía Auður Birgisdóttir28. mars 2023

NÝ LJÓÐABÓK EFTIR HÖLLU

Út er komin þriðja ljóðabók Höllu Gunnarsdóttur sem ber hinn einfalda titil Þú.

Tíu ár eru síðan Halla sendi frá sér ljóðabókina Tvö jarðar ber, en fyrsta ljóðabók hennar, Leitin að Fjalla-Eyvindi, kom út 2007.

Í bókinni yrkir Halla um það að eignast barn; um fæðinguna, um barnauppeldi, það hlutverk að vera foreldri og tilfinningarnar sem það vekur... og margt fleira.  Í kynningu útgáfunnar segir:
 
Halla Gunnarsdóttir yrkir hér um fæðingu og fyrstu tilfinningaþrungnu vikurnar í lífi móður og barns. Hún lýsir átökunum, sársaukanum og gleðinni en inn á milli skjóta upp kollinum kómískir atburðir sem eiga sér stað mitt í þessu tilfinningaróti.
 
 
 
 
Í ljóðinu "Plan" er lýst reynslu sem margar konur geta tengt við:
 
 
Planið
var
 
að hossast á bolta
liggja í laug
undir seiðandi tónum
 
anda eins og hafið
 
vera fjall
tignarlegt fjall.
 
En ég er aurskriða
sem tekur allt með sér
í fallinu.
 
Enginn tími 
til að anda.
 
 
Í ljóðinu Stjórnsemi er sjónarhorninu beint að afskiptasemi "velviljaðra frænkna" og skemmtilegum viðbrögðum móðurinnar.
 
Hún er að reyna að stjórna ykkur
segja velviljaðar frænkur.
 
Brún mín sígur
augnaráðið fjarlægist
andardrátturinn kólnar.
 
Hún er að reyna að stjórna
sínu eigin lífi
 
svara ég.
 
Myndina af Höllu tók María Rún Bjarnadóttir á útgáfukynningu í Gunnarshúsi.

 

Tengt efni