JÚLÍÖNUHÁTÍÐ OG ÚTGÁFUFÖGNUÐUR LJÓÐASAFNS SKÁLDKONUNNAR
Í gærkvöldi hófst þrettánda hátíð Júlíönu - hátíð sögu og bóka í Stykkishólmi og stendur hún til 21. mars. Líkt og ævinlega verður boðið upp á metnaðarfulla dagskrá þar sem rithöfundar, skáld og annað listafólk stígur á stokk. Nálgast má dagskrána hér.
Hátíðin er kennd við skáldkonuna Júlíönu Jónsdóttur (1838-1917) en hún var fyrst kvenna til að senda frá sér ljóðabók. Sú bók ber titilinn Stúlka og kom hún út árið 1876. Júlíana gaf síðan út aðra ljóðabók löngu síðar sem nefnist Hagalagðar og kom hún út í Winnipeg árið1916. Auk þessa skrifaði Júlíana leikritið Víg Kjartans Ólafssonar og er það fyrsta leikritið sem samið er af konu og sömuleiðis það fyrsta sem er samið upp úr Íslendingasögunum. Það rataði á svið í Stykkishólmi árið 1879 og lék Júlína sjálf aðalhlutverkið, Guðrúnu Ósvífursdóttur. Leikritið kom síðan út á bók árið 2001 í ritstjórn Helgu Kress.
Í ár er sérstök ástæða til að fagna, þar sem báðar ljóðabækur Júlíönu eiga merkisafmæli. Bókin Stúlka kom út fyrir 150 árum og Hagalagðar fyrir 110 árum. Í tilefni þessara tímamóta fékk stofnandi Júlíönuhátíðar, Gréta Sig. Bjargardóttir, Forlagið til að gefa út ljóðasafn Júlíönu í einu bindi og nefnist það Ljóðmæli: Stúlka & Hagalagðar. Silja Aðalsteinsdóttir skrifar formála og Sólveig Ásta Sigurðardóttir eftirmála.
Þetta glæsilega ljóðasafn Júlíönu verður fáanlegt á hátíðinni í ár og verður því sérstaklega fagnað í safnaðarheimili Stykkishólmskirkju kl. 16:00 í dag. Bókin og hátíðin eru einnig til umfjöllunar í Kiljunni, þar sem Egill Helgason ræðir við Grétu um útgáfuna. Þar er einnig rætt við Ellert Kristinsson en hann hefur gert upp Kristjánshús í Stykkishólmi, þar sem Júlíana bjó um tíma.
