Blóðdropinn, hin íslensku glæpasagnaverðlaun voru afhent í dag en þau voru veitt í fyrsta sinn haustið 2007. Verðlaunabókin er framlag Íslands til Glerlykilsins, norrænu glæpasagnaverðlaunanna.
Sigurvegarinn í ár er Ragnheiður Gestsdóttir, fyrir Farangur.
Um bókina
Ylfa stendur á brautarpallinum, loksins búin að gera upp hug sinn. Hún verður að komast burt. Undir eins, áður en hann vaknar. Lestin, sem er væntanleg á hverri stundu, mun bera hana fyrsta áfangann á leiðinni heim. Heim í öryggið á Íslandi. Ekkert má koma í veg fyrir að hún komist af stað. Ekki einu sinni þessi óvænti farangur sem hún fær í fangið.
Ragnheiður hefur skrifað bækur frá 1986 og hlotið margvísleg verðlaun og viðurkenningar.
Innilegar hamingjuóskir frá skáld.is!
Fimm glæpasögur voru tilnefndar til verðlaunanna:
Lilja Sigurðardóttir: Náhvít jörð
Ragnheiður Gestsdóttir: Farangur
Stefán Máni: Horfnar
Yrsa Sigurðardóttir: Lok, lok og læs
Þórarinn Leifsson: Út að drepa túrista
