SKÁLD.IS

Konur skrifa um konur sem skrifa

Hildur Hákonardóttir

Auður Hildur Hákonardóttir er fædd 1938.

Hildur stundaði nám við MR frá 1953-55 og fluttist til Bandaríkjanna árið 1956. Hún lagði stund á myndlistarnám við Myndlista- og handíðaskóli Íslands 1964-68 og Edinburgh College of Art 1968-69. Lauk vefnaðarkennaraprófi 1979 og hefur starfað við myndvefnað síðan og sýnt verk sín hérlendis og erlendis.

Hildur var kennari (og skólastjóri 1975-78) við MHÍ frá 1969 og allt til 1980. 

Hildur fluttist í Ölfusið 1980 og var forstöðumaður Byggða- og listasafns Árnesinga til 1986-1993 og í hálfu starfi við Listasafnið 1997-2000.

Hildur starfaði með SÚM hópnum og var í forsvari þar um tíma eftir að hinn eiginlegi kjarni hans leystist upp og fór úr landi. Hún tók þátt í samsýningum hérlendis og erlendis og á verk á Listasafni Íslands, Listasafni Reykjavíkur, Nýlistasafninu, Listasafni Árnesinga og í nokkrum opinberum byggingum. 

Hildur starfaði að ýmsum félagsmálum tengdum listgrein sinni, og stofnaði Ullarvinnslu Þingborgar ásamt Helgu Thoroddsen árið 1991. Hún hefur tekið virkan þátt í samvinnu fagfólks frá Hjaltlandi og Noregi í þeim tilgangi að endurvekja þekkingu á hinum forna kljásteinavefstað og afurðum hans og efla sögu kvenna.

Hildur lagði drögin að starfsfyrirkomulagi Rauðsokkahreyfinguarinnar, hún á myndasögu um tildrög hans í riti sem hún helgaði kvennafrídeginum 1975 og minningu frumherjans, blaða- og baráttukonunnar Vilborgar Harðardóttur.

Hildur hefur einnig reynt sig við þýðingar og ásamt Elísabetu Gunnarsdóttur þýddi hún Walden. Lífið í skóginum eftir H. D. Thoreau. Verkið kom út 2017 og hlaut Íslensku þýðingarverðlaunin. Hildur sat í tilnefningarnefnd íslensku þýðingarverðlaunanna árið eftir, 2018.

Auk þeirra rita sem eru hér á ritaskrá hefur Hildur birt efni í eftirfarandi bókum: Dagbók Íslendinga (1999), Hefurðu séð huldufólk (2007) Á rauðum sokkum. Baráttukonur segja frá (2011) og The Warp Weighted Loom. Oppstadveven, Kljásteinavefstaðurinn, (Gerstad Museum, Skald, Bergen, 2016).

Hildur hefur haldið nokkrar einkasýningar á verkum sínum og tekið þátt í fjölda samsýninga. 2023 var haldin stór yfirlitssýning á verkum hennar á Kjarvalsstöðum, með yfirskriftinni Rauðir þræðir.

Hildur hlaut Heiðurslaun Listamanna í byrjun árs 2023 en slík laun eru veitt fyrir ævistarf og njóta listamennirnir þeirra til æviloka.


Ritaskrá

  • 2023  Rauður þráður
  • 2021  Hvað er svona merkilegt við það að vera biskupsfrú? II
  • 2019  Hvað er svona merkilegt við það að vera biskupsfrú? I
  • 2008  Blálandsdrottningin og fólkið sem ræktaði kartöflurnar
  • 2005  Ætigarðurinn
  • 2005  Já, ég þori, get og vil 

 

Einkasýningar

  • 2023  Kjarvalsstaðir, Rauður þráður
  • 2022  Safnasafnið á Svalbarðseyri: Ef væri ég birkitré
  • 2011  Listasafn ASI
  • 1985  Gallery Lækjargata
  • 1974  Héraðsbókasafn Selfoss
  • 1971  Gallery Sum

 

Verðlaun og viðurkenningar

  • 2024  Riddarakross hinnar íslensku fálkaorðu
  • 2023  Heiðurslaun listamanna
  • 2017  Íslensku þýðingarverðlaunin fyrir Walden. Lífið í skóginum eftir H. D. Thoreau (ásamt Elísabetu Gunnarsdóttur)
  • 2012  Heiðursverðlaun Sjónlista 
  • 2006  Starfslaun úr rithöfundasjóði
  • 2005  Starfslaun úr rithöfundasjóði
  • 1973  Starfslaun listamanna
  • Heiðursfélagi Nýlistasafns Íslands

 

Þýðingar

  • 2017 H. D. Thoreau: Walden. Lífið í skóginum, ásamt Elísabetu Gunnarsdóttur

 

Tengt efni