SKÁLD.IS

Þórdís Þúfa Björnsdóttir er fædd í Reykjavík 7. ágúst 1978.

Hún lauk stúdentsprófi frá Menntaskólanum í Reykjavík árið 1999 og BA-prófi í almennri bókmenntafræði frá Háskóla Íslands 2005.

Þórdís gaf sjálf út sína fyrstu ljóðabók, Ást og appelsínur, haustið 2004 sem vakti athygli, og fram til ársins 2009 sendi hún frá sér tvær ljóðabækur til viðbótar, prósaverk og tvær skáldsögur, en bækurnar komu út í eigin útgáfu, hjá Nýhil og hjá Bjarti. Eftir það tók hún sér drjúgt hlé frá birtingu, að undanskilinni einni ljóðabók undir dulnefni árið 2012. En árið 2019 steig hún fram á nýjan leik með skáldsöguna Sólmund sem kom út hjá bókaútgáfunni Sæmundi. Árið 2024 stofnaði hún útgáfuna Þúfuna ásamt öðrum konum og í sameiningu sendu þær frá sér fyrstu skáldævisögu Þórdísar, Þín eru sárin, þá um haustið, en þar fjallar hún á áræðinn hátt um upplifun sína af kynferðislegum árásum, sem og eigin úrvinnslu. Verk Þórdísar hafa komið út á ensku og þýsku, og ljóð hennar hafa birst í safnritum og tímaritum víða um heim.

Þórdís las upp á Bókmenntahátíðinni í Reykjavík 2007. Hún hlaut styrk frá Art Angel árið 2010 ásamt þriggja mánaða dvöl á Vatnasafninu Stykkishólmi, og árið 2011 var hún einn af íslenskum höfundum á Bókamessunni í Frankfurt. Það sama ár var hún jafnframt fulltrúi Íslands á norrænni bókmenntahátíð á vegum Litteraturhuset í Osló. Árið 2016 hlaut hún mánaðardvöl á listamannasetrinu Villa Sarkia í bænum Sysmä í Finnlandi í boði ljóðahátíðarinnar Poetry Moon í Helsinki þar sem hún kom fram meðan á dvölinni stóð.

Þórdís Þúfa á tvær dætur og býr á Seltjarnarnesi ásamt fjölskyldu sinni.