SKÁLD.IS

Konur skrifa um konur sem skrifa

Benný Sif Ísleifsdóttir

Benný Sif Ísleifsdóttir er fædd árið 1970 á Eskifirði og ólst þar upp.

Hún lauk meistaraprófi í þjóðfræði frá Há­skóla Íslands, prófi í hag­nýtri ís­lensku og tók að auki diplóma­nám í Youth and Comm­unity Studies frá Saint Mart­in´s Col­l­e­ge.

Benný Sif hlaut nýræktarstyrk Miðstöðvar íslenskra bókmennta 2018 fyrir fyrstu skáldsögu sína, Grímu. Nýræktarstyrkir eru veittir árlega til útgáfu á skáldverkum höfunda sem eru að stíga sín fyrstu skref á ritvellinum og hvetja þá með því til frekari dáða á þeirri braut.

Í umsögn dómnefndar sagði: „Gríma er sögu­leg skáld­saga sem seg­ir frá ör­lög­um kvenna í ís­lensku sjáv­arþorpi um og eft­ir miðja tutt­ug­ustu öld. Sag­an er gríp­andi, per­sónu­sköp­un sterk og bygg­ing verks­ins vel út­hugsuð. Text­inn er lif­andi og skemmti­leg­ur en um leið lýs­ir höf­und­ur harm­ræn­um at­b­urðum af ein­stakri næmni. Frá­sagn­argleði og vænt­umþykja fyr­ir viðfangs­efn­inu ein­kenna þessa hríf­andi skáld­sögu.“ Sama ár sendi Benný frá sér barnabókina Jólasveinarannsóknina. Um þessa sterku innkomu á ritvöllinn segir Benný Sif í viðtali við Austurfrétt:

„Svona af því ég er nýr höfundur og komin á miðjan aldur varð ég bara að byrja með trukki og koma með tvær bækur í ár,“ segir Benný og hlær. „Ég hef alltaf ætlað mér að skrifa en var ekki komin á þann stað fyrr en núna. Ég á fimm börn og fjögur fyrstu eru fædd á tæpum sex árum þannig að það var nóg að gera á stóru heimili. Þegar þau fóru að stálpast eignaðist ég eitt í viðbót og fór svo í þjóðfræði í Háskóla Íslands þar sem ég tók bæði grunn- og meistaragráðu. Eftir það sá ég fyrir mér að fá vinnu við fagið en þegar það gekk brösulega ákvað ég að setjast niður og gera það sem mig hafði alltaf langað, þannig að stundum þarf eitthvað svoleiðis til þess að maður hundskist í verkið!“ 

Skáldsagan Hansdætur, sem kom út 2020, sló rækilega í gegn. Þar er sögð saga Gratíönu, ákveðinnar og sjálfstæðrar stúlku í íslensku sjávarþorpi á fyrri hluta tuttugustu aldar. Sagan er bæði feminísk og fyndin, skrifuð af miklu fjöri og innsæi í sögu kvenna. Aðdáendur bókarinnar bíða spenntir eftir framhaldinu, sem kemur út nú á haustdögum 2022. 

2021 sendi Benný Sif frá sér skáldsöguna Djúpið, þar sem hún rýnir í samskipti kynjanna á kvennaárinu 1975.

Benný Sif býr í Kópavogi ásamt eiginmanni sínum. Hún á fimm börn. 

Mynd: Bókabeitan


Ritaskrá

  • 2023  Einstakt jólatré
  • 2022  Gratíana
  • 2021  Djúpið
  • 2020  Hansdætur
  • 2019  Álfarannsóknin
  • 2018  Gríma
  • 2018  Jólasveinarannsóknin

 

Verðlaun og viðurkenningar

  • 2020  Íslensku hljóðbókaverðlaunin fyrir Grímu
  • 2018  Nýræktarstyrkur fyrir Grímu

 

Tilnefningar

  • 2021  Til Bókmenntaverðlauna Evrópusambandsins fyrir Hansdætur

 

Heimasíða

https://www.facebook.com/Benny.Sif.Isleifsdottir

Tengt efni