SKÁLDKONA DAGSINS - Sigurlín Bjarney Gísladóttir
Skáldkona dagsins er Sigurlín Bjarney Gísladóttir. Hún er fædd árið 1975 og er með meistaragráðu í ritlist og íslenskum bókmenntum frá Háskóla Íslands. Auk ritstarfa sinnir hún íslenskukennslu í framhaldsskóla.
Fyrsta bók Sigurlínar Bjarneyjar, Fjallvegir í Reykjavík, kom út árið 2007 og hefur að geyma prósaljóð. Síðan hefur hún sent frá sér fleiri ljóðabækur, örsagna- og smásagnasafn og nóvellur.
Sigurlín Bjarney hefur tvisvar sinnum verið tilnefnd til ljóðabókaverðlaunanna Maístjörnunnar, fyrir bækurnar Tungusól og nokkrir dagar í maí (2016) og Undrarýmið (2019)
Í fyrra sendi Sigurlín Bjarney frá sér nóvelluna Sólrún: Sögu um ferðalag (2022) og er hún væntanleg fljótlgea á Storytel í lestri Kristbjargar Kjeld. Hér á vefnum má lesa ritdóm um nóvelluna og viðtal við skáldkonuna um bókina. Hér má síðan horfa á skáldkonuna segja frá bókinni.
Í nýja bókmenntaþættinum á RÚV, Bara bækur, var Sigurlín Bjarney sótt heim og skoðað var í bókahillurnar hjá henni. Hlýða má á þáttinn hér.
Eftirfarandi ljóð er úr ljóðabókinni Undrarýminu:
Bleiktunga, blóðtunga
Allt sem ég hef sagt
hingað til
safnast saman á tungu minni
orðin hópa sig saman
samtengingar í miðjunni
forsetningar til hliðar
lýsingarorðin fremst
nafnorðin aftast
sagnorðin út og suður
alls staðar
Hún brotnar
oft á dag
klofnar
en grær
strax aftur
Orðin sem ég gat ekki sagt
hefði betur sagt
brjóta sér leið
út um kokið
taka stökkið af tungubroddi
og segja bara eitt:
Fyrirgefðu
