Soffía Auður Birgisdóttir∙18. janúar 2024
VÖLVUR OG VÆRINGJAR. Vilborg heldur fyrirlestur
Laugardaginn 20. janúar heldur Vilborg Davíðsdóttir fyrirlestur sem ber yfirskriftina Völvur og væringjar. Fyrirlesturinn er á vegum Ásatrúarfélagsins og hefst hann klukkan 14 í Hofi félagsins í Öskjuhlíð. Aðgangur er ókeypis og allir velkomnir meðan húsrúm leyfir er fyrirlestrinum verður einnig streymt á facebook-síðu Ásatrúarfélagsins.
Í kynningu segir:
Í nýrri bók, Landi næturinnar, segir Vilborg Davíðsdóttir frá ævintýralegri ferð völvunnar Þorgerðar Þorsteinsdóttur í Austurveg en það er heitið sem norrænir menn höfðu um siglingaleiðina úr Eystrasalti um ár og fljót Austur-Evrópu á víkingaöld. Vilborg leiðir lesendur þar ekki aðeins um Garðaríki heldur einnig í seiðferð í aðra heima. Hún ræðir í erindinu m.a. mikilvægi völvunnar í norrænni trú og átrúnað á gyðjur. Þá mun hún fjalla um tengslin á milli spuna og fjölkynngi og sýna okkur bæði ullar- og völvustaf.
Á bókarkápu segir um skáldsöguna, sem tilnefnd er til Íslensku bókmenntaverðlaunanna: „Þorgerður Þorsteinsdóttir hefur lifað mikinn harm heima á Íslandi og heldur til Noregs þar sem örlögin leiða hana í faðm skinnakaupmannsins Herjólfs Eyvindarsonar. Saman halda þau til Garðaríkis, á fund væringja sem sigla suður Dnépurfljót og yfir Svartahaf með ambáttir og loðfeldi á markað í Miklagarði. Í landi næturinnar bíða þeirra launráð og lífsháski. Á augabragði er Þorgerður orðin ein meðal óvina og kemst að því að stundum kostar það meira hugrekki að lifa en deyja.“
Stund: Laugardagurinn 20. janúar kl. 14:30
Staður: Hof Ásatrúarfélagsins við Menntasveig 15 (Öskjuhlíð)
Staður: Hof Ásatrúarfélagsins við Menntasveig 15 (Öskjuhlíð)
Opið hús frá 14 til 16.
