NANNA RÖGNVALDARDÓTTIR HLÝTUR BARNABÓKAVERÐLAUN GUÐRÚNAR HELGADÓTTUR
Barnabókaverðlaun Guðrúnar Helgadóttur komu að þessu sinni í hlut Nönnu Rögnvaldardóttur fyrir handrit að bókinni Flóttinn á norðurhjarann.
Heiða Björg Hilmisdóttir, borgarstjóri, afhenti verðlaunin í Höfða fyrr í dag en þau eru veitt árlega fyrir óprentað handrit að barna- eða ungmennabók. Alls barst 71 handrit í keppnina og kemur bók Nönnu út hjá Forlaginu í næsta mánuði.
Í dómnefnd sátu Þorgeir Ólafsson, Ragnheiður Gestsdóttir og Jónella Sigurjónsdóttir. Í umsögn hennar segir meðal annars:
Þrátt fyrir að Flóttinn á norðurhjarann gerist fyrir löngu síðan hefur sagan sterka samfélagslega tengingu við nútímann. Stúlkan og móðir hennar eru á flótta, það hafa orðið skelfilegar náttúruhamfarir og hungursneyð í kjölfar þeirra og það reynir á hvernig tekið er á móti flóttafólki. Sagan er engu að síður falleg og hugljúf á köflum og lýsir góðum og slæmum eiginleikum í fari fólks.
Dómnefndin telur að Flóttinn á norðurhjarann falli börnum frá 10 ára aldri vel í geð og veiti þeim lestraránægju auk þess að veita þeim innsýn í líf okkar hér á landi fyrr á tímum. Engin leið er jafn áhrifarík til að setja sig í spor annarra og sú að lifa sig inn í góða sögu og fátt hefur verið um sögulegar skáldsögur ætlaðar börnum og unglingum, sögur sem fá fortíðina til að lifna við.
Nanna hefur áður sent frá sér matreiðslubækur og skáldsögur ætlaðar fullorðnum en þetta er hennar fyrsta barnabók.
Skáld.is óskar Nönnu innilega til hamingju.
Myndin er fengin af síðu Miðstöðvar íslenskra bókmennta.