SKÁLD.IS

Konur skrifa um konur sem skrifa

Arndís Þórarinsdóttir

Arndís Þórarinsdóttir er fædd árið 1982 í Reykjavík.

Arndís er með BA gráðu í almennri bókmenntafræði frá Háskóla Íslands, MA gráðu í leikritun frá Goldsmiths College, University of London og MA gráðu í ritlist frá Háskóla Íslands. Hún hefur starfað sem blaðamaður og gagnrýnandi og var deildarstjóri á Bókasafni í Kópavogs í rúm tíu ár áður en hún sneri sér alfarið að ritstörfum.

Árið 2005 birtist fyrsta smásaga hennar, „Líf og önd“, í Tímariti Máls og menningar og hefur hún síðan sent reglulega frá sér smásögur auk þess að skrifa í bæði dagblöð og tímarit.

Fyrsta skáldsaga Arndísar, Játningar mjólkurfernuskálds, kom út 2011. Þessi frásögn af fermingarstúlku sem fer út af sporinu hlaut mjög góðar viðtökur og var tilnefnd til Norrænu barnabókaverðlaunanna 2013.

Arndís hefur skrifað talsvert fyrir Námsgagnastofnun, þar á meðal stuttar skáldsögur fyrir mið- og unglingastig.

Haustið 2018 kom barnabókin Nærbuxnaverksmiðjan út, sem er fyndin og fjörmikil saga ætluð lesendum á yngri stigum grunnskóla. Ári síðar komu Nærbuxnanjósnararnir og var bókin tilnefnd til Íslensku bókmenntaverðlaunanna í flokki barna- og unglingabóka. Þriðja bókin í seríunni, Nærbuxnavélmennið, bættist síðan við árið 2020.

Í samvinnu við Huldu Sigrúnu Bjarnadóttur skrifaði Arndís bókina Blokkin á heimsenda sem kom út árið 2020. Sagan gerist á óræðum stað en þar er tekist á við ýmis mikilvæg málefni eins og einmanaleika og einangrun, mikilvægi þess að vera í samskiptum við aðrar maneskjur. Loftlagsváin er einnig til umfjöllunar en lögð er áhersla á að mannskepnan komi vel fram við náttúruna og vinni saman að því að vernda hana. Bókinni var afar vel tekið en hún hlaut bæði Íslensku bókmenntaverðlaunin og Barnabókaverðlaun Guðrúnar Helgadóttur.

2020 sendi Arndís frá sér sína fyrstu ljóðabók, Innræti. Þar er meðal annars ort um ólík hlutverk kvenna, hversdagsleg atvik og ýmis fyrirbæri. Bókin var tilnefnd til Íslensku bókmenntaverðlaunanna í flokki skáldverka.

Bál tímans kom út vorið 2021 og var tilnefnd til Íslensku bókmenntaverðlaunanna. Bókin er einstök fyrir þær sakir að sögumaður hennar er sjálf Möðruvallabók sem segir lesendum sínum frá tilurð sinni til tímans þega hún flytur í Hús íslenskra fræða.

Arndís hefur einnig fengist við þýðingar og ritstjórn, meðal annars hefur hún þýtt Hulduheima-seríuna eftir Rosie Banks og bókmenntaritgerð J.R.R. Tolkien; Bjólfskviða: Forynjurnar og fræðimennirnir.

Arndís hefur stýrt fjölmörgum ritsmiðjum fyrir bæði börn og fullorðna. Þá hefur hún unnið mikið að félagsmálum tengdum barnabókmenntum og var formaður IBBY á Íslandi um árabil. Hún situr nú í stjórn Síung á íslandi, samtaka íslenskra barna- og unglingabókahöfunda.

Arndís býr í Reykjavík með eiginmanni sínum og tveimur börnum.


Ritaskrá

  • 2023  Mömmuskipti (með Huldu Sigrúnu Bjarnadóttur)
  • 2022  Kollhnís
  • 2021  Bál tímans
  • 2020  Nærbuxnavélmennið
  • 2020  Innræti
  • 2020  Arfurinn
  • 2020  Blokkin á heimsenda (með Huldu Sigrúnu Bjarnadóttur)
  • 2019  Nærbuxnanjósnararnir
  • 2019  Galdraskólinn
  • 2018  Nærbuxnaverksmiðjan
  • 2015  Gleraugun hans Góa
  • 2013  Lyginni líkast
  • 2011  Játningar mjólkurfernuskálds

 

Verðlaun og viðurkenningar

  • 2023  Verðlaun bóksala (ásamt Huldu Sigrúnu Bjarnadóttur) fyrir Mömmuskipti
  • 2023  Barnabókaverðlaun Reykjavíkurborgar fyrir Kollhnís
  • 2023  Fjöruverðlaunin fyrir Kollhnís
  • 2022  Íslensku bókmenntaverðlaunin fyrir Kollhnís
  • 2020  Íslensku bókmenntaverðlaunin (ásamt Huldu Sigrúnu Bjarnadóttur) fyrir Blokkina á heimsenda
  • 2020  Barnabókmenntaverðlaun Guðrúnar Helgadóttur (ásamt Huldu Sigrúnu Bjarnadóttur) fyrir Blokkina á heimsenda
  • 2019  Viðurkenning Ljóðstafs Jóns úr Vör
  • 2016  Viðurkenning Ljóðstafs Jóns úr Vör
  • 2011  Nýræktarstyrkur Bókmenntasjóðs

 

Tilnefningar

  • 2023  Til Íslensku bókmenntaverðlaunanna (ásamt Huldu Sigrúnu Bjarnadóttur) fyrir Mömmuskipti 
  • 2022  Til Norrænu barnabókmenntaverðlaunanna fyrir Kollhnís
  • 2021  Til Íslensku bókmenntaverðlaunanna fyrir Bál tímans
  • 2020  Til Íslensku bókmenntaverðlaunanna fyrir Innræti
  • 2019  Til Íslensku bókmenntaverðlaunanna fyrir Nærbuxnanjósnarana
  • 2013  Til Norrænu barnabókmenntaverðlaunanna fyrir Játningar mjólkurfernuskálds

Þýðingar

  • 2020  Tove Jansson: Dúkkuhúsið í Smásögur heimsins. Evrópa
  • 2017-2020 Rosie Banks: Hulduheima-serían
  • 2013  J.R.R. Tolkien: Bjólfskviða: Forynjurnar og fræðimennirnir

 

Tengt efni