SKÁLD.IS

Fríða Ísberg er fædd árið 1992. Hún lauk stúdentsprófi frá Menntaskólanum við Hamrahlíð, og grunnprófi í heimspeki og meistaraprófi í ritlist við Háskóla Íslands. Hennar fyrsta útgefna verk er ljóðabókin Slitförin sem kom út árið 2017 hjá bókaforlaginu Partusi. Fyrir ljóðahandritið fékk Fríða nýræktarstyrk frá Miðstöð íslenskra bókmennta en í umsögn dómnefndar um bókina segir meðal annars: „Slitförin er safn ljóða sem fjalla á ágengan hátt um togstreituna við að brjótast undan áhrifavöldum bernskunnar og finna leiðina að eigin sjálfi. Leiðarstef verksins er sársaukinn sem sprettur úr nístandi sorg milli barns og foreldris. Ljóðin taka pláss, sýna afstöðu og grípa lesendur föstum tökum.“ Sama ár og Slitförin kom út hlaut Fríða þriðju verðlaun í keppninni um Ljóðstaf Jóns úr Vör.

Árið 2018 kom út smásagnasafnið Kláði. Ungt fólk er í aðalhlutverki í flestum sögunum enda fjallar Fríða um málefni eigin kynslóðar í bókinni. Sögurnar gerast í nútímanum í Reykjavík en persónur þeirra eiga það sameiginlegt að klæja bæði í og undan ýmsum viðfangsefnum samtíma síns, meðal annars kynjamisrétti. Fyrir Kláða hlaut Fríða tilnefningu til Bókmenntaverðlauna Norðurlandaráðs árið 2020 og Fjöruverðlaunanna 2019 í flokki fagurbókmennta. Þýðingar á bókinni hafa komið út eða eru væntanlegar á dönsku, úkraínsku og ungversku.

Önnur ljóðabók Fríðu Leðurjakkaveður kom út árið 2019 hjá Forlaginu en þar tekst Fríða á við togstreitu þess að berskjalda sig eða setja upp harðan skráp og vera töffari. 

Fyrsta skáldsaga Fríðu er Merking (2021). Bókin er margradda vísindaskáldsaga en þar er tekist á við pólaríseringu, fordóma og samkennd. Verkið hlaut Bóksalaverðlaunin og var tilnefnt til Fjöruverðlaunanna í flokki fagurbókmennta.

Fríða er hluti af sex kvenna skáldahópi sem kallar sig Svikaskáld. Saman hafa þær gefið út þrjár ljóðabækur; Ég er ekki að rétta upp hönd (2017), Ég er fagnaðarsöngur (2018) og Nú sker ég netin mín (2019) auk einnar skáldsögu Olíu (2021). Auk þess hefur Fríða birt ljóð í ýmsum tímaritum, bæði innlendum og erlendum. Þá skrifar hún bókmenntarýni fyrir Times Literary Supplement og var einn af ritstjórum Meðgöngumála, smásagnaseríu Partusar.

Í byrjun árs 2022 hlaut Fríða Íslensku bjartsýnisverðlaunin 2021.