Guðrún Hannesdóttir
Guðrún Hannesdóttir fæddist þann 18. júní árið 1944.
Guðrún lauk stúdentsprófi frá MR árið 1964, nam listasögu við háskólann í Lundi frá 1968-70 og lauk BA-prófi í bókasafnsfræði frá Háskóla Íslands árið 1979. Guðrún starfaði lengst af sem bókasafnsfræðingur og hafði umsjón með bókasafni Myndlistarskólans í Reykjavík.
Guðrún sendi frá sér bókina Gamlar vísur handa nýjum börnum árið 1994, en þar safnaði hún saman vísum fyrir börn og myndskreytti. Fleiri gamlar vísur handa nýjum börnum komu út ári seinna og fleiri barnabækur sendi Guðrún frá sér áður en hún sneri sér að ljóðlistinni.
Fyrsta ljóðbók Guðrúnar var Fléttur sem kom út árið 2007.
Guðrún hefur auk þess sýnt myndir sínar bæði á einka- og samsýningum hér á landi og víða erlendis.
Guðrún sat lengi vel í stjórn samtakanna Barna og bóka, Íslandsdeildar IBBY-samtakanna, sem og í ritstjórn tímaritsins Börn og menning, sem samtökin gefa út. Hún hefur hlotið verðlaun fyrir bæði skrif sín og myndskreytingar, þá helst Íslensku barnabókaverðlaunin ásamt Sigrúnu Helgadóttur árið 1996 fyrir Risann þjófótta og skyrfjallið, sem Guðrún myndskreytti; og Ljóðstaf Jóns úr Vör árið 2007 fyrir ljóðið „Offors.“
Þá hlaut Guðrún Íslensku þýðingarverðlaunin árið 2021 fyrir þýðingu sína á skáldsögunni Dyrnar eftir Magda Szabó.
Finna má umfjöllun um nokkur ljóð eftir Guðrúnu í grein Bergljótar Soffíu Kristjánsdóttur „Í landslagi allra lófa" sem birtist í ritinu Hugraun. Nútímabókmenntir og hugræn fræði, og ritdóma um nokkrar bóka hennar hér á vefnum.
Guðrún er búsett í Reykjavík.
Ritaskrá
Ljóðabækur
- 2024 Kallfæri
- 2022 Fingramál
- 2020 Spegilsjónir
- 2018 Þessa heims
- 2016 Skin
- 2015 Humátt
- 2014 Slitur úr orðabók fugla
- 2012 Teikn
- 2010 Staðir
- 2007 Fléttur
Barnabækur
- 2006 Gormur: saga um tólf litla ánamaðka
- 2003 Hvar?
- 2001 Einhyrningurinn
- 2001 Sagan um Pomperipossu með langa nefið
- 1999 Eina kann ég vísu: skrýtinn kveðskapur frá ýmsum tímum
- 1998 Kerlingin vill hafa nokkuð fyrir snúð sinn
- 1997 Sagan af skessunni sem leiddist
- 1996 Risinn þjófótti og skyrfjallið (myndskreyting)
- 1995 Fleiri gamlar vísur handa nýjum börnum
- 1994 Gamlar vísur handa nýjum börnum
Verðlaun og viðurkenningar
- 2021 Íslensku þýðingarverðlaunin fyrir Dyrnar eftir Mögdu Sazbó
- 2007 Ljóðstafur Jóns úr Vör fyrir „Offors“.
- 2004 Ljóðstafur Jóns úr Vör, sérstök viðurkenning fyrir ljóðið „Þar“.
- 1998 Heiðurslisti IBBY-samtakanna á alþjóðaráðstefnu í Dehli fyrir Risinn þjófótti og skyrfjallið.
- 1996 Íslensku barnabókaverðlaunin fyrir Risinn þjófótti og skyrfjallið (ásamt Sigrúnu Helgadóttur)
- 1994 Viðurkenning Íslandsdeildar IBBY-samtakanna fyrir Gamlar vísur handa nýjum börnum.
Tilnefningar
- 2016 Til Fjöruverðlaunanna fyrir Humátt
Þýðingar
- 2024 Rose Lagercrantz: Besta gjöfin (ásamt Maríu S. Gunnarsdóttur)
- 2022 Rose Lagercrantz: Við sjáumst...! (ásamt Maríu S. Gunnarsdóttur)
- 2021 Rose Lagercrantz: Ég var svo hamingjusöm...
- 2021 Rose Lagercrantz: Dinna í blíðu og stríðu
- 2021 Ulf Stark: Amódeus litli
- 2020 Magda Szabó: Dyrnar
- 2019 Rose Lagercrantz: Hjarta mitt skoppar og skellihlær
- 2019 Rose Lagercrantz: Hamingjustundir Dinnu
